Om Birla: ଲୋକଙ୍କ ସ୍ୱର ଶୁଣାଯାଉ, ସଂସଦ ଚାଲୁ: ବିର୍ଲାଙ୍କ ଭାବପୂର୍ଣ୍ଣ ଆହ୍ୱାନ
ଲଗାତାର ବିରୋଧୀ ଦଳଙ୍କ ହଟ୍ଟଗୋଳ ଯୋଗୁଁ ଲୋକସଭା କାର୍ଯ୍ୟ ଅଚଳ ହୋଇପଡ଼ିଥିବା ବେଳେ ଆଜି ସବୁ ଦଳର ନେତାଙ୍କୁ ସଂସଦ ଚଳାଇବା ପାଇଁ ସହଯୋଗ କରିବାକୁ ଭାବପୂର୍ଣ୍ଣ ଆହ୍ୱାନ ଦେଇଛନ୍ତି ବାଚସ୍ପତି ଓମ୍ ବିର୍ଲା।
ନୂଆଦିଲ୍ଲୀ: ଲଗାତାର ବିରୋଧୀ ଦଳଙ୍କ ହଟ୍ଟଗୋଳ ଯୋଗୁଁ ଲୋକସଭା କାର୍ଯ୍ୟ ଅଚଳ ହୋଇପଡ଼ିଥିବା ବେଳେ ଆଜି ସବୁ ଦଳର ନେତାଙ୍କୁ ସଂସଦ ଚଳାଇବା ପାଇଁ ସହଯୋଗ କରିବାକୁ ଭାବପୂର୍ଣ୍ଣ ଆହ୍ୱାନ ଦେଇଛନ୍ତି ବାଚସ୍ପତି ଓମ୍ ବିର୍ଲା। ସୋମବାର ଲୋକସଭାର ବିଜ୍ନେସ ଆଡ୍ଭାଇଜରି କମିଟି ବୈଠକରେ ସେ କହିଛନ୍ତି, ଲୋକଙ୍କ ସ୍ୱର ସଂସଦରେ ଶୁଣାଯିବା ଦରକାର। ସଂସଦରେ ଆଲୋଚନା ଓ ସାର୍ଥକ ତର୍କ ମାଧ୍ୟମରେ ଜନସାଧାରଣଙ୍କ ସମସ୍ୟା ଉପସ୍ଥାପିତ ହେବା ଉଚିତ ବୋଲି ସେ କହିଛନ୍ତି।
ବାଚସ୍ପତି ସବୁ ଦଳର ନେତାଙ୍କୁ ଆହ୍ୱାନ କରି କହିଛନ୍ତି, ସଂସଦୀୟ ପରମ୍ପରାର ସର୍ବୋଚ୍ଚ ମର୍ଯ୍ୟାଦା ବଜାୟ ରଖି ଗୃହର କାର୍ଯ୍ୟ ସୁଚାରୁ ଭାବେ ଚାଲିବାକୁ ସହଯୋଗ କରାଯାଉ। ବିଭିନ୍ନ ଗୁରୁତ୍ୱପୂର୍ଣ୍ଣ ବିଲ୍ ଉପରେ ସାଂସଦମାନେ ନିଜ ମତ ରଖିବାର ସୁଯୋଗ ପାଇବା ଆବଶ୍ୟକ। ହଟ୍ଟଗୋଳ ଯୋଗୁଁ ଆଲୋଚନା ବନ୍ଦ ହେଲେ ଲୋକଙ୍କ ସମସ୍ୟା ଉପରେ ସଂସଦରେ ବିସ୍ତୃତ ଓ ଫଳପ୍ରଦ ଚର୍ଚ୍ଚା ହୋଇପାରିବ ନାହିଁ ବୋଲି ସେ କହିଛନ୍ତି। ଚଳିତ ମୌସୁମୀ ଅଧିବେଶନରେ ବିରୋଧୀ ଦଳଗୁଡ଼ିକର ଲଗାତାର ପ୍ରତିବାଦ ମଧ୍ୟରେ ଆଜି ୧୬ଶ ଦିନ ପାଇଁ ଲୋକସଭା ପ୍ରଶ୍ନକାଳ ସମ୍ପୂର୍ଣ୍ଣ ହୋଇପାରିନାହିଁ। ଛାତ୍ରମାନଙ୍କ ଉପରେ ପୁଲିସର କଥିତ ଅତ୍ୟାଚାର ଓ ଦେଶର ବିଭିନ୍ନ ସ୍ଥାନରେ ନିଟ୍ ପ୍ରଶ୍ନପତ୍ର ଲିକ୍ ନେଇ ବିରୋଧୀ ଦଳଗୁଡ଼ିକ ଗୃହମନ୍ତ୍ରୀ ଅମିତ ଶାହଙ୍କ ଜବାବ ଦାବି କରୁଛନ୍ତି। ଏହା ସହ ଅଯୋଧ୍ୟାର ରାମମନ୍ଦିର ପାଇଁ ସଂଗୃହୀତ ଦାନରେ ଅନିୟମିତତା ନେଇ ମଧ୍ୟ ଆଲୋଚନା ଦାବି କରାଯାଉଛି।
ଏପର୍ଯ୍ୟନ୍ତ ଚଳିତ ଅଧିବେଶନରେ ଲୋକସଭା ୯ଟି ବିଲ୍ ପାରିତ କରିଥିବା ବେଳେ ମାତ୍ର ୨ଟି ବିଲ୍ ଉପରେ ଆଲୋଚନା ହୋଇଛି। ଆଜି ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ଛାତ୍ର ଆନ୍ଦୋଳନ ଓ ପୁଲିସ କାର୍ଯ୍ୟାନୁଷ୍ଠାନ ଉପରେ ଲୋକସଭାରେ ଆଲୋଚନା ପାଇଁ ସରକାର ପ୍ରସ୍ତୁତ ବୋଲି କହିଥିଲେ। ଗୃହମନ୍ତ୍ରୀ ଏହାର ଜବାବ ଦେବେ ବୋଲି ସେ କହିଥିଲେ। ବିରୋଧୀ ଦଳ ଆଲୋଚନା ସମୟରେ ହଟ୍ଟଗୋଳ ନକରି ଶାନ୍ତିପୂର୍ଣ୍ଣ ଭାବେ ଶୁଣିବାକୁ ନିଶ୍ଚିତ କରୁ ବୋଲି ରିଜିଜୁ ଆହ୍ୱାନ ଦେଇଥିଲେ। ସରକାରଙ୍କ ଏହି ଆଶ୍ୱାସନ ସତ୍ତ୍ୱେ ବିରୋଧୀ ସାଂସଦଙ୍କ ହଟ୍ଟଗୋଳ ମଧ୍ୟରେ ଜାତୀୟ ଟ୍ରିବ୍ୟୁନାଲ କମିସନ ଗଠନ ସମ୍ପର୍କିତ ବିଲ୍ ଆଲୋଚନା ବିନା ପାରିତ ହୋଇଛି।
ସୌଜନ୍ୟ ସମ୍ବାଦ
