ନୂଆଦିଲ୍ଲୀ: ଭାରତ ନିଜର ପରମାଣୁ ଅସ୍ତ୍ର ବହନକାରୀ ବ୍ୟବସ୍ଥାର ଆଧୁନିକୀକରଣ ଓ ସମ୍ପ୍ରସାରଣ ଜାରି ରଖିଛି ବୋଲି ପ୍ରତିଷ୍ଠିତ ସଂସ୍ଥା ବୁଲେଟିନ୍ ଅଫ୍ ଦି ଆଟୋମିକ୍ ସାଇଣ୍ଟିଷ୍ଟ୍ସ (ବିଏଏସ୍) ପକ୍ଷରୁ ପ୍ରକାଶିତ ଏକ ନୂତନ ଆକଳନରେ କୁହାଯାଇଛି। ହାନ୍ସ ଏମ୍ କ୍ରିଷ୍ଟେନସେନ, ମ୍ୟାଟ୍ କୋର୍ଡା, ଏଲିଆନା ଜନ୍ସ ଏବଂ ମ୍ୟାକେଞ୍ଜି ନାଇଟ୍-ବଏଲ୍ଙ୍କ ଦ୍ୱାରା ଲିଖିତ ଏହି ରିପୋର୍ଟ ଅନୁଯାୟୀ, ଭାରତ ବର୍ତ୍ତମାନ ସୁଦ୍ଧା ପ୍ରାୟ ୧୯୦ଟି ପରମାଣୁ ଯୁଦ୍ଧାସ୍ତ୍ର ଏକତ୍ରିତ କରିସାରିଛି।
ପରମାଣୁ ଯୁଦ୍ଧାସ୍ତ୍ର ପ୍ରୟୋଗ ପାଇଁ ଆବଶ୍ୟକ ବିମାନ, ସ୍ଥଳଭାଗର କ୍ଷେପଣାସ୍ତ୍ର ଏବଂ ସମୁଦ୍ରଭିତ୍ତିକ ପ୍ରଣାଳୀର ଏକ ସମ୍ପୂର୍ଣ୍ଣ କାର୍ଯ୍ୟକ୍ଷମ ପରମାଣୁ ତ୍ରିଶକ୍ତି (ନ୍ୟୁକ୍ଲିୟର ଟ୍ରାଏଡ୍) ରହିଛି। ଭାରତ ନିଜର ସାମରିକ ଅସ୍ତ୍ରଶସ୍ତ୍ରର ପ୍ରକୃତ କ୍ଷମତା ବା ସାମରିକ ପରିସରକୁ କେବେ ବି ସାର୍ବଜନୀନ କରେନାହିଁ ଏବଂ ଏହାର ପରମାଣୁ ଭଣ୍ଡାର ଚାରିପାଖରେ ବ୍ୟାପକ ଗୋପନୀୟତା ରକ୍ଷା କରିଥାଏ।
ରିପୋର୍ଟ ମୁତାବକ, ଭାରତୀୟ ବାୟୁସେନା ପାଖରେ ପରମାଣୁ ଆକ୍ରମଣ ପାଇଁ ଦୁଇଟି ଶ୍ରେଣୀର ବିମାନ ରହିଛି। ଫ୍ରାନ୍ସ ଜ୍ଞାନକୌଶଳରେ ନିର୍ମିତ ଓ ଅପଗ୍ରେଡ୍ ହୋଇଥିବା ମିରାଜ୍ ୨୦୦୦ ମୁଖ୍ୟ ଆଣବିକ ଷ୍ଟ୍ରାଇକ୍ ବିମାନ ହୋଇଥିବା ବେଳେ ବ୍ରିଟେନ ଓ ଫ୍ରାନ୍ସର ମିଳିତ ଡିଜାଇନରେ ନିର୍ମିତ ଜାଗୁଆର ମଧ୍ୟ ଏହି ଦାୟିତ୍ୱ ତୁଲାଉଛି। ଭବିଷ୍ୟତରେ ଜାଗୁଆର ବିମାନ ଅବସର ନେବା ପରେ ଫ୍ରାନ୍ସରୁ କିଣାଯାଇଥିବା ରାଫେଲ୍ ଫାଇଟର ଏହି ସ୍ଥାନ ନେଇପାରେ। ଆମେରିକା ପାଖରେ ବି-୨ ଓ ବି-୨୧ ଭଳି ଷ୍ଟେଲ୍ଥ ବମ୍ବର ଏବଂ ଚୀନ୍ ପାଖରେ ଏଚ୍-୬ ସିରିଜ୍ ବମ୍ବର ଥିବା ବେଳେ ପାକିସ୍ତାନ ମୁଖ୍ୟତଃ ଯୁଦ୍ଧ ବିମାନ ଓ ବିସ୍ତାରିତ କ୍ଷେପଣାସ୍ତ୍ର ବାହିନୀ ଉପରେ ନିର୍ଭର କରେ। ମାତ୍ର ଭାରତ ଯୁଦ୍ଧ ସମୟରେ ନିଜ ସୁରକ୍ଷା ପାଇଁ ବିମାନ, ସ୍ଥଳ ମିସାଇଲ ଏବଂ ବୁଡ଼ାଜାହାଜର ଏକ ସନ୍ତୁଳିତ ଓ ଅତି ସୁଦୃଢ଼ ବ୍ୟବସ୍ଥା ଗଢ଼ି ତୋଳିଛି।
ଡିଆରଡିଓ ଦ୍ୱାରା ସ୍ୱଦେଶୀ ଜ୍ଞାନକୌଶଳରେ ବିକଶିତ ଅଗ୍ନି କ୍ଷେପଣାସ୍ତ୍ର ଶୃଙ୍ଖଳା ଭାରତର ରଣନୀତିକ ପ୍ରତିରୋଧର ମେରୁଦଣ୍ଡ ସାଜିଛି। ଭାରତ ନିଜ ଚେଷ୍ଟାରେ ସ୍ୱଳ୍ପ ଦୂରଗାମୀ ପୃଥ୍ୱୀ ଏବଂ ଅଗ୍ନି-୧ ଠାରୁ ଆରମ୍ଭ କରି ଦୂରଗାମୀ ଅଗ୍ନି-୫ କ୍ଷେପଣାସ୍ତ୍ର ପ୍ରଯୁକ୍ତି ହାସଲ କରିଛି। ବର୍ତ୍ତମାନ ଭାରତ ପାଖରେ ୬ଟି କାର୍ଯ୍ୟକ୍ଷମ ପରମାଣୁ କ୍ଷମତା ସମ୍ପନ୍ନ ବାଲିଷ୍ଟିକ୍ ମିସାଇଲ ପ୍ରଣାଳୀ ଯଥା- ପୃଥ୍ୱୀ ୨, ଅଗ୍ନି ୧ (୭୦୦ କିମି), ଅଗ୍ନି ୨ (୨,୦୦୦ କିମିରୁ ଅଧିକ), ଅଗ୍ନି ୩ (୩,୨୦୦ କିମିରୁ ଅଧିକ), ଅଗ୍ନି ୪ (୩,୫୦୦ କିମିରୁ ଅଧିକ) ଏବଂ ଅଗ୍ନି ୫ (୬,୦୦୦ କିମିରୁ କମ୍) ରହିଛି। ଏହା ସହିତ ଅଧିକ ଉନ୍ନତ କ୍ଷେପଣାସ୍ତ୍ର ବ୍ୟବସ୍ଥା ମଧ୍ୟ ପ୍ରସ୍ତୁତ ହୋଇସାରିଲାଣି। ଅଗ୍ନି-୫ କ୍ଷେପଣାସ୍ତ୍ର ସମ୍ପୂର୍ଣ୍ଣ ପାକିସ୍ତାନ, ଚୀନ୍, ମଧ୍ୟ ଏସିଆ, ଦକ୍ଷିଣ-ପୂର୍ବ ଏସିଆ, ମଧ୍ୟପ୍ରାଚ୍ୟ ଏବଂ ୟୁରୋପର ବହୁ ଅଞ୍ଚଳକୁ ଟାର୍ଗେଟ୍ କରିପାରିବ।
ସୌଜନ୍ୟ ସମ୍ବାଦ
