ତିରୁଭାନନ୍ତପୁରମ: କେରଳମ୍ର ଗୃହମନ୍ତ୍ରୀ ରମେଶ ଚେନ୍ନିଥାଲା ମୁଖ୍ୟ ନିର୍ବାଚନ କମିସନର (ସିଇସି) ଜ୍ଞାନେଶ କୁମାରଙ୍କ ସହ ଜଡିତ ପ୍ରାୟ ଦୁଇ ଦଶନ୍ଧି ପୁରୁଣା ମାମଲାର ଭିଜିଲାନ୍ସ ତଦନ୍ତ ପୁଣି ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ମାମଲା କେରଳ ରାଜ୍ୟ ପରିବହନ ପ୍ରକଳ୍ପ ସହିତ ଜଡିତ। ଏହା ଅନ୍ତର୍ଗତ ଜଣେ ବିଦେଶୀ ଇଞ୍ଜିନିୟର ନିଜ ଜୀବନ ନେବା ଏବଂ ଦୁର୍ନୀତି ଅଭିଯୋଗର ତଦନ୍ତ କରାଯିବ।
ରିପୋର୍ଟ ଅନୁଯାୟୀ, କେରଳମ୍ ଗୃହ ବିଭାଗ ୨୦୦୬ ମସିହାରେ ଜ୍ଞାନେଶ କୁମାର ରାଜ୍ୟର ପବ୍ଲିକ୍ ୱାର୍କସ୍ ଡିପାର୍ଟମେଣ୍ଟର ସଚିବ ଥିବା ସମୟରେ ହୋଇଥିବା ଏକ ଭିଜିଲାନ୍ସ ତଦନ୍ତର ରେକର୍ଡ ମଧ୍ୟ ତଲବ କରିଛି ।ପାଟି-ବେଲ୍ ନାମକ ଏକ ଇଣ୍ଡୋ-ମାଲେସିଆନ୍ କନସୋର୍ଟିୟମ୍ର ଇଞ୍ଜିନିୟର ଲି ସି ବୀନ୍ ନିଜ ଜୀବନ ନେବା ପରେ ଏହି ମାମଲା ସାମ୍ନାକୁ ଆସିଥିଲା । ରିପୋର୍ଟ ଅନୁଯାୟୀ, ଇଞ୍ଜିନିୟର ଜଣକ ଏକ ସୁଇସାଇଡ୍ ନୋଟ୍ରେ ଜ୍ଞାନେଶ କୁମାରଙ୍କ ନାମ ନେଇଥିବା ଅଭିଯୋଗ ହୋଇଛି।
ନୋଟ୍ରେ ପ୍ରକଳ୍ପ ସହିତ ଜଡିତ ଦେୟ ଏବଂ ବିଲ୍ ସମ୍ପର୍କରେ ଗମ୍ଭୀର ଅଭିଯୋଗ ଥିଲା। ପ୍ରକଳ୍ପ ଅଧୀନରେ ଦେୟ ଏବଂ ବିଲ୍ ସମାଧାନରେ ଅସୁବିଧା ହେଉଥିବା ଅଭିଯୋଗକୁ ନେଇ ବିବାଦ ଉପୁଜିଥିବା ରିପୋର୍ଟ ହୋଇଥିଲା। ଏହା ପରେ, ତତ୍କାଳୀନ ବାମ ଗଣତାନ୍ତ୍ରିକ ସାମ୍ମୁଖ୍ୟ(ଏଲଡିଏଫ) ସରକାର ଏହି ମାମଲାର ଭିଜିଲାନ୍ସ ତଦନ୍ତ ନିର୍ଦ୍ଦେଶ ଦେଇଥିଲେ।
ପ୍ରାୟ ଦୁଇ ଦଶନ୍ଧି ପୁରୁଣା ଏହି ମାମଲାକୁ ଏପରି ସମୟରେ ପୁଣି ଥରେ ଚର୍ଚ୍ଚାକୁ ଅଣାଯାଉଛି ଯେତେବେଳେ କଂଗ୍ରେସ ଏବଂ ବିରୋଧୀ ଦଳଗୁଡ଼ିକ ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କ ଉପରେ ଲଗାତାର ପ୍ରଶ୍ନ ଉଠାଇବାରେ ଲାଗିଛନ୍ତି। ସମ୍ପ୍ରତି ରମେଶ ଚେନ୍ନିଥାଲା ମଧ୍ୟ ଜ୍ଞାନେଶ କୁମାରଙ୍କ ଇସ୍ତଫା ଦାବି କରିଛନ୍ତି। ସେ ନିର୍ବାଚନ କମିସନଙ୍କର କାର୍ଯ୍ୟକାରିତା ଏବଂ ନିର୍ବାଚନ ପ୍ରକ୍ରିୟା ଉପରେ ଗମ୍ଭୀର ପ୍ରଶ୍ନ ଉଠାଇଛନ୍ତି। ତେବେ ପୂର୍ବ ଭିଜିଲାନ୍ସ ତଦନ୍ତରେ କ’ଣ ନିଷ୍କର୍ଷ ବାହାରିଛି ଏବଂ ବର୍ତ୍ତମାନର ତଦନ୍ତରେ କେଉଁ ଦିଗଗୁଡ଼ିକୁ ପୁଣି ଯାଞ୍ଚ୍ କରାଯିବ ତାହା ରେକର୍ଡର ବିସ୍ତୃତ ସମୀକ୍ଷା ପରେ ସ୍ପଷ୍ଟ ହେବ।
ସୌଜନ୍ୟ ସମ୍ବାଦ
